شن أحمد شوبير حارس مرمى الأهلي ومنتخب مصر السابق، هجوما عنيفا على مجلس إدارة نادي الزمالك بسبب البيان الذي أصدره في الساعات الماضية بخصوص أزمات النادي مع اللاعبين وربطها بسحب أرض أكتوبر من النادي.
وقال أحمد شوبير في تصريحات إذاعية اليوم الخميس: «نادي الزمالك أصدر بيانا حول قضايا اللاعبين على النادي، والبالغ مجموع المطلوب فيها 7 ملايين جنيه، وقال إن سبب الأزمة سحب أرض أكتوبر، وإن إدارة النادي ستتحرك ضد مَن يلقي اتهامات باطلة ضد نادي الزمالك».
اقرأ أيضًا: ميدو يشكو مجلس الزمالك ببلاغ رسمي إلى نيابة الأموال العامة العليا
وعلق شوبير ساخرًا: «بصراحة، وبكل صراحة، ملقتش في بيانك راحة. وما يزعلوش مني اخواتي الأعزاء في مجلس إدارة نادي الزمالك إنت هتفضل تقول أرض أكتوبر أرض أكتوبر، ده احنا نعملها أغنية بقه، أرض أكتوبر إيه بس، خلصت أرض أكتوبر ونوفمبر وديسمبر، أرض إيه اللي انت جاي تقول عليها».
وتابع شوبير: «هى الناس لما انتخبت مجلس إدارة نادي الزمالك انتخبت رجال أعمال وناس عندهم شطارة في التسويق، ده حسين السيد يا جماعة طلع عينه، ومبيكلمش ولا بيفتح بوقه، وبعدين ما أنت خدت أرض أكتوبر جديدة بقالها كتير، وبعدين الشركة المتحدة بتساعدك كويس قوي وبتجيب لك فلوس كتير، إنت كمجلس إدارة ما تشتغل وتجيب فلوس للنادي».
وأوضح شوبير: «طيب أقول لك إن اللعيبة حاليا عندها مشاكل كبيرة بسبب المستحقات، ولعيبة الزمالك أبطال وصبرت عليك كتير ده معتمد جمال بيقبض على سطر ويسيب سطرين، وكمان معلقه، وكل شوية تقول هجيب مدرب أجنبي ومش عارف إيه».
وأضاف شوبير: «وعلى فكرة اللي بيكلم من أبناء الزمالك وزعلان ده حبا للنادي وحرصا عليه، أنا ضد أي تعريض في السمعة أو الشرف، لكن في نفس الوقت إنت كمجلس إدارة من حق الجمهور والأعضاء واللاعبين إنهم يشعرو بالاطمئنان معاكم، شوف فرقة السلة بتخسر وفرقة الكرة زعلانين، لكنهم بيلعبوا».
